sonst noch was der herr?

jetz dazöl mas nuamoi:
du bist weda frou noch mou?
sog wia geht des, wohea wasts?
des heat sich komisch ou?

wonn i mi frog, bin i a mou?
was i ned was i do gspia;
i wasas hoid; es is ned schwea
ma siagt i bin a hea

dia frog kriagst ouwa wieda gstöd
eakläat hosts scho dreitosnd moi
und wos mochst jetzt? dakläasts heit?
gschnoid homs jo no kane leid

wia gfuist di heid? dei tiafe stimm
heats o wia vun an moi
gfuist di heit mea duat, mea do?
dei reckal geht da scho weng o

De finganägl frisch lackiat
de strümpf sitzn peafekt
es makeup dauert; richtig fesch
heit gehst all in mit deina wäsch

siass schogst os - du stichst herous
de blick londn of dia
doss se denken, wasd eh scho;
nur monchmoi songsas zu dia:

mou hea of, du bist a schond
ziag os de hochn schua
es gheat si ned, i hott mi gschamt
du bist oiwa bo a bua

hoss ignorian, des host gleant
do driwa lochn konnst
so isas hoid wonnst bist wiad bist
da ondre is hoid a sexist

du bist stoak; stegst do mit stuiz
ois wea da olls wuascht
de büdl wos donn oiwa mochn
und lauta ondre gschissne sochn

owa gno do, wos ned eawoatst,
do triffts dia wia an schlog:
du bstöst beim bäcka, donn ontwuat dea dea
sonst no wos, da hea?

Queerness, Poetry, Dialekt